Umuyobozi w’Umujyi wa Kigali n’Umuyobozi Mukuru wa RSB batangiza inama

Uyu munsi tariki ya 7 Kanama 2018, ku butumire bw’Ikigo cy’Igihugu Gitsura Ubuziranenge, inzego zitandukanye za Leta n’iz’abikorera bahuriye mu nama yiga ku bibazo bimaze iminsi bigaragara mu gutunganya no gucuruza ifu ikomoka ku bigori.

Iyi nama yabereye kuri Hill Top Hotel yitabirwa na Madamu Umuyobozi w’Umujyi wa Kigali, Umuyobozi Mukuru wa RSB, n’abandi bayobozi mu nzego za Leta n’iz’abikorera zirimo Minisiteri y’Ubucuruzi n’Inganda (MINICOM), Minisiteri y’Ubuhinzi n’Ubworozi (MINAGRI), Umujyi wa Kigali, Ikigo cy’Igihugu gishinzwe guteza imbere ubushakashatsi mu nganda (NIRDA), Ikigo cy’Igihugu gishinzwe kurengera ibidukikije (REMA), Uhagarariye ishyirahamwe nyarwanda rihuriza hamwe inganda nto n’izicirirtse zitunganya ifu ikomoka ku bigori (AMMIRWA), n’abandi.

Mu gutangiza iyi nama, Bwana Murenzi Raymond, Umuyobozi Mukuru wa RSB yibukije abayitabiriye ko impamvu iyi nama yatekerejweho ari uko igihugu cyakoze byinshi mu guteza imbere no kongera umusaruro w’ibigori; iyi gahunda itanga umusaruro ndetse hanashyirwaho uburyo bwo kubungabunga ubuziranenge bw’umusaruro, kuwuhunika ndetse no kuwutunganya; ariko agaragaza ko hakiri imbogamizi nyinshi zishingiye k’ubuziranenge bw’umusaruro w’ibigori ndetse n’abatunganya ifu ikomoka ku bigori badakurikiza amabwiriza y’ubuziranenge bityo bikaba byashyira ubuzima bw’abaguzi mu kaga. Yasabye ko higwa uburyo bw’ubufatanye bw’inzego zitandukanye zaba iza Leta n’iz’abikorera hagamijwe gukemura ibibazo bihari, guteza imbere inganda ndetse no kubungabunga ubuzima bw’abaguzi.

RSB yatanze ikiganiro ku bisabwa n’amabwiriza y’ubuziranenge agenga imitunganyirize iboneye y’ifu ikomoka ku bigori ndetse hanagaragazwa uko imikorere mu nganda zitunganya ifu y’ibigori ihagaze. Muri iki kiganiro hagaragajwe mu buryo bwimbitse ibibazo bigaragara mu nganda nto n’iziciriritse zitunganya ifu y’ibigori ndetse hanagaragazwa ingamba zaganisha ku kubikemura.

Mu kiganiro cyatanzwe n’Umujyi wa Kigali, hibanzwe kuri gahunda yo kwimura inganda zikorera mu bishanga n’aho igeze ishyirwa mu bikorwa. Umujyi wa Kigali wagaragaje ko mu turere twose tuwugize hateganyijwe ahagenewe inganda nto n’iziciriritse, bityo ibikorwa byose bibanganiye ibidukikije byamaze gusabwa kwimuka bikajya ahateganyijwe.

Umukozi w’Umujyi wa Kigali atanga ikiganiro

Umuyobozi uhagarariye Minisiteri y’Ubuhinzi n’Ubworozi yatanze ikiganiro cyagaragaje ingamba zo gufata neza umusaruro w’ibigori hirindwa ko wakwangirika ukangizwa na aflatoxin n’izindi mikorobe zangiza umusaruro. MINAGRI yagaragaje ko hamaze gukorwa byinshi kandi inzira yo gukomeza kwigisha abahinzi n’inganda uburyo bwo kubungabunga umusaruro irakomeje.

Uhagarariye Minisiteri y’Ubuhinzi n’Ubworozi atanga ikiganiro

Uhagarariye REMA yagarutse ku bisabwa inganda zitunganya umusaruro w’ibigori kugira ngo zitunganye umusaruro zidahumanya ikirere cyangwa ngo zangize ibidukikije.

Umuyobozi w’Umujyi wa Kigali, Madamu Marie Chantal Rwakazina, yahamagariye inzego zose gufatanya kugira ngo ibikorerwa mu Rwanda bitezwe imbere mu buryo bukurikije amabwiriza y’ubuziranenge, burengera ibidukikije kandi ifu y’ibigori itunganywa mu gihugu ibe itagira ingaruka ku baguzi ahubwo ibashe guhangana n’izindi  ziri ku isoko. Yijeje ubufatanye bw’Umujyi wa Kigali muri iyi gahunda ndetse anahamagarira inzego zose kugira iyi gahunda iyazo kugira ngo inganda nto zifashwe gukorera ahakwiriye, zikora mu buryo busabwa kandi ibyo zikora byongererwe agaciro; bityo zigire ururhare rurgaragara mu iterambere ry’igihugu.